測試此欄進行中

2018年7月29日 星期日

垃圾食物食得開心又環保呀

之前提到我食麵包皮,今日仲有正野,係蛋糕皮呀,正呀,食垃圾食到咁開心我真係異類呀!

為了營養均衡,我早上都係食十穀,再加支益力多,拿一把腰果杏仁當小食,晚上唔食飯只食生果(連皮食)。

所以只得中午食百幾克麵包皮或今次蛋糕皮,食我唔死仲KEEP到體態。(而家60KG)



2018年7月27日 星期五

長建電能業績,又收息

電能業績微升2%,意料之外,畢竟都冇咩發圍空間,現金又派到七七八八,預期電能只能向港燈埋手,搞下D土地轉換益下長實了。由於電能的業務同長建高度重疊,業績非常穩健,仲有些少增長空間,未來派息料持平微增,遠好過年金。

而長建呢,增長比電能多D,未來假設收購不成都仲有自然增長,唔會死錯人,末期息都係升架啦,如果澳洲單大鵰俾澳洲政府通過就可以再派多D息喇。

都係穩穩陣陣揸住佢地慢慢收息,最近加入持倉的煤氣都唔錯紅股除淨前16蚊,而家又16蚊,多謝四叔。

最近大市普遍下調,我D公用收息冇咩郁,重倉的新意網最近更加爆升,咩事?不過都唔沽,唔關我事啦。

電能+長建的中期息,我大約收息近兩萬。


2018年7月17日 星期二

唔還最低還款額又能保持負百萬

呢130萬信用卡額(準確係129.2萬),俾我月月玩到100萬,唔知銀行例行查信貸報告時會點諗呢......(呢條友,咁堅....)


回帶相關貼文:
能隨便負債百萬也是實力的表現


2018年7月12日 星期四

能隨便負債百萬也是實力的表現

我相當能夠負債的人,比不能負債或難以大額負債的人更具實力。

你要破百萬,好簡單,月入一萬五,月儲一萬,一百個月就得啦,都唔使九年。

但係呢,想負一百萬喎......

壞結局,
月入一萬五,搵銀行借,月薪俾夠15倍啦,咪22萬丫,你想再多D?銀行唔批你啦,再搵財仔咪又係借多20萬丫,加埋都係四五十萬,信用評級仲花哂,你想負債破百萬就只能唔還錢之餘由得佢滾大,用法定最高年利率,大約3年你就負百萬啦,不過係之前你應該已經俾人申請破產,所以未到百萬負債級就出左局啦。

中性結局要靠外人,
月入一萬五,月儲一萬,到了第七年,有現金84萬,結婚,聯名,再買樓,仲要過到壓測,俾埋什費結婚錢,仲要九成按,買400萬樓,即係負360萬,一人一半,你終於負180萬啦,恭喜,你用7年時間達標。

中性結局不結婚靠自己仍然有排都未達標,
月入一萬五,月儲一萬,申請信用卡,首張信用卡額介乎一萬至八萬左右,信用卡額備用為主,白紙一張的信用評級要慢慢執正,用信用卡交下水電煤,準時還。

次年,現金有12萬全買公用股,申請第二張,可能有五至十萬,信用卡額備用為主。

第三年,有現金12萬再買公用股及上年公用股12萬及上年股息,又去加大信用卡額及申請信用卡,估計總信用卡額不難突破20萬。

第四年,估計已有50至60萬市值的資產,用抵押透支槓桿出30萬再射到其他銀行,申請信用卡,信用評級果度睇唔到證券抵押的。銀行只會以為你有90萬,抵押透支前的最新月結單,之後再槓桿出來的30萬開儲蓄戶口再一併申請信用卡,果一刻,神鬼都唔知你有30萬負債,順利又可提升總信用卡額,可能升到30萬左右,成功買入將錢射回,即係撒佢資。

第五年,可以接下銀行電話推銷的私貸,借15萬月平息0.2%應該冇問題啦,借款全買公用,呢一年又儲左12萬,又買公用啦,資產多左又可以申請多張信用卡,升到35萬左右冇咩問題,咁你應該手持90萬左右資產,35萬信用卡額,15萬私貸,40萬抵押透支額度。

第六年,還清私貸又儲左12萬,加埋股息,都係90至100萬資產,在一百萬的一刻去加大信用卡額再申請信用卡都SO EASY,信用卡額破40萬甚至50萬都冇問題,你信用評級咁好,又淨資產近百萬,好客呀!呢個時候,你即時玩信用卡套現又借私貸,都係負60至70萬,你的抵押透支不出現在信用評級,你都唔算負百萬,呢個結局,推演至第六年都未能夠隨隨便便負百萬,但係你的淨資產值卻已經係百萬級。

你話,負百萬仲難過搵百萬,我地要敬佩負百萬的人,我一直都認為「你欠銀行百幾萬呀」係好勁好厲害,最利害係銀行信你喎,願意批百萬俾你,呢樣野分分鐘有錢都買唔到。

所以,當你地聽見人地話有一百萬,不必葡萄,你也許可串佢,那麼你能夠負一百萬嗎?手持一百萬都唔能夠由銀行借番一百萬走,叻個屁

目前我總信用卡額已暴漲至130萬(光是恆生都38萬...),另有少量私貸,我隨時隨地可以挾帶私逃130萬走,我最喜歡用呢幾句串我D大學生同學,而我只係中五畢業,真係串到佢地反擊不能,我好希望有更多人做到。

渲洩一下情緒,皆因我身邊太多高學歷,知道我學歷後仲自以為高人一等。


回帶相關貼文:
月入一萬,十年不變,怎樣破百萬?

2018年7月4日 星期三

長和又有動作啦

長和將增持WIND TRD餘下股權,作價220億,不便宜亦不昂貴,觀乎長和手持大筆現金,料對盈利增長有幫助,但負債亦會上升,都係好過咩都唔做。

長和本已經是該公司大股東,再增持的話,我相信都係有普通市民睇唔到的內部消息,佢身為大股東睇住盤數咁耐再拍板全購,唔會死錯人。

我仍然重點持有長和系,係呢度俾D長和系小股民信心,我沒有沽,仲有增持長和系添呀,希望下份成績表好好睇睇,俾番D信心落股價度啦。


2018年7月3日 星期二

20180702,六月結

  本月市值變化跟隨大市下滑,無計啦,貿戰嘛,另買了5000股長江基建。月供股票是恆基地產及中華煤氣電能實業

  本月繼續很忙,正準備新業務中。


截至20180703,目前持股:
00001 - 長和     5000股  -$ 83.20
00392 - 北京控股   6000股  -$ 38.20
08008    - 新意網   94000股  -$  4.65
02318 - 中國平安   1000股  -$ 72.20
01038 - 長江基建  17500股  -$ 54.80
06823 - 香港電訊  35000股  -$ 10.02
01928 - 金沙中國    463股  -$ 41.95(月供股票)
00006 - 電能實業  10733股  -$ 54.55(月供股票)
00003 - 中華煤氣   1184股  -$ 15.02(月供股票)
00012 - 恆基地產    214股  -$ 41.50(月供股票)
00257    - 光大國際  10000股  -$ 10.14
00371    - 北控水務  60000股  -$  4.73
01257    - 光大綠色   5000股  -$  8.20
00807    - 上實環境   5000股  -$  2.52
06839    - 雲南水務  10000股  -$  2.70
00772    - 閱文集團    400股  -$ 73.70(扣除家人後持有)
00700    - 騰訊控股   1175股  -$393.80(扣除家人後持有)


股票總市值:$4131413
物業供滿率:32.29%(25%已付首期+75% x14/144)
加上手上現金再減負債後,計入物業後淨資產:$1267821

對比2017年12月31日淨資產:$1175933,上升+7.81%

回帶相關貼文: