測試此欄進行中

2019年3月28日 星期四

2019最新的支付工具現金流

除恆生及大新外的信用卡一家4口總額120000蚊以上
用作高回贈的八達通增值的信用卡一家4口總額80000蚊以上
大新卡用在轉移負債,一家4口總額200000蚊以上
恆生卡用在轉移負債,一家4口總額200000蚊以上
平均每位家人的信用卡額15萬即可,其中必須各有上述一項信用卡而卡額不應低於建議總額的25%,不然操作麻煩。
卡冚卡不需要一定冚自己名的卡數,冚人地都得,靈活有彈性,當然如果每位家人都特高卡額仲好玩。

O易PAY提現月限額10000,一家4口就40000蚊。(用渣打1.5%卡增值,月賺150x4蚊)
微信增值月限額5000,一家4口就20000蚊。
PAYME增值月限額5000,一家4口就20000蚊。
支付寶增值月限額5000,一家4口就20000蚊。
總額100000蚊。

第一個月套左上述10萬
第二個月仲用緊果五十幾日免息期暫不用還,我又套左10萬。累計20萬擺係我戶口。

第三個月將第一個月D數轉哂去大新卡,一家4口大新卡負10萬,仲有1000蚊手續費,我馬上調撥支付工具的回贈支付(我每月1200蚊)交左果筆手續費唔洗煩先,我馬上又去套10萬,累計30萬啦。

第四個月將第二個月時套現果筆卡數轉去大新,大新卡由負10萬變成負20萬,仲有新果筆1000蚊手續費,又馬上用回贈支付,而第一個月套現果筆錢仲用緊大新果五十幾日免息期唔洗還。轉哂D數俾大新我又去套10萬啦,累計40萬。

第五個月,第一個月果筆數轉左俾大新後,終於大新到期找數,將呢筆馬上射俾恆生卡,之後大新卡又空出限額來,我將第三個月套現果筆卡數交俾大新,大新卡由負20萬變成負10萬再變回負20萬,之後我又去套10萬,累計50萬。

第六個月,第二個月果筆數轉左俾大新後,終於大新到期找數,將呢筆馬上射俾恆生卡,之後大新卡又空出限額來,我將第四個月套現果筆卡數交俾大新,大新卡由負20萬變成負10萬再變回負20萬,之後我又去套10萬,累計60萬。

第七個月,第一個月果筆數轉左俾大新後已經轉左去恆生卡度,終於恆生到期找數,我施施然從現金60萬取出10萬繳付,套現額降至50萬。不過,還款後恆生卡空出10萬額,我將即將到期的第二個月卡數的數由大新轉去恆生,之後我又去套10萬,重返60萬。

之後一直loop,運算結果係你個現金戶口長駐50至70萬,第7個月後累積到50至60萬之後不斷套10萬又現金還10萬。

以上例子已實際操作,我一直用緊呢五六十萬無本生利,用回贈冚手續費,仲拎去買公用股收下息。不過,你前提係有真實人頭去玩,如果唔用佢地名下信用卡玩,你可以申請附屬卡玩,年費可以打電話豁免,年費可以打電話豁免,年費可以打電話豁免,年費可以打電話豁免....


2019年3月26日 星期二

月供股票變更,主力供恆基

早前,已經酌量減持煤氣2000股,目前最新仍持有7577股,恆基地產就升至1904股了。

恆基地產身上全是寶,雖則我對佢投得美利道項目感憂慮,但身上眾多的寶貝足夠踢走呢個因素。

恆基身上近四成的煤氣已經係一寶,如果實物分派,李家都仲有多數控制權三成,同另一個李家一樣。

之後就係一大堆唔見光的舊樓重建項目,唔係有心搵,你都根本唔知佢係邊度就快收夠籌強拍,總之年年都見報,近排又強拍左大角咀和紅磡啦,其實佢手持的舊樓市值到底有幾多架,唔該。

恆基油塘灣項目有幾百萬尺樓面,可售資源係幾千伙,幾百億級項目,呢幾年會黎料,人工島果堆麵粉講緊203X年先有,呢個油塘灣搣到2022都得。

而農地轉換的話,恆基又大把農地。而恆基租金年收入70億賺五十幾億,年年五十幾億冇汗錢足夠公司任何發展。

暫時睇呢真係,論增長阿媽比阿仔稍勝,論股息又多過阿仔,論估值唔洗問,比起阿仔非常便宜。

由今日起,即下月開始,以月供恆地取代煤氣。




2019年3月21日 星期四

東亞銀行卡冚卡又送錢俾你啦

拿,唔好以為你張東亞銀行信用卡的限額小就玩唔到!!!

目標係賺盡300蚊!



假設你:
東亞銀行信用卡額為60000,不須理會截數日
恆生銀行信用卡額為60000,不須理會截數日
截至今日,兩卡結欠為零

我假設信用卡額各得60000,數字上唔夠上一次咁親民~
1,上網登記左先(請查看電郵或信件),今次東亞銀行表明不需登記,慳番,優惠期即日起至3月28日
2,登入東亞銀行網上銀行,按「繳款」>「 賬單」>「商戶分類選銀行及信用卡服務」>「選咩發卡銀行」>「 之後寫你自己果張恆生銀行信用卡號碼」>「繳款賬戶寫你張東亞銀行信用卡」
3,金額寫57000,東亞會扣你57000及翌日扣你2850手續費,假設是3月21日做。
 4,東亞銀行信用卡於3月22日會有59850結欠
5,恆生銀行信用卡於3月25日(23號星期六順延)收到東亞銀行繳款,由0升至57000淨現金
6,恆生銀行信用卡於3月25日即日設定「繳款」到東亞卡,金額59850
7,恆生銀行信用卡於3月27日由57000淨現金降到2850結欠
8,3月27日東亞銀行收到繳款恆生,由59850結欠回到零結欠,即日3月27日在東亞再重複第2步和第3步
9,3月28日東亞卡會有59850結欠
10,恆生銀行信用卡於3月29日收到東亞銀行繳款,由2850結欠至54150淨現金
11,恆生銀行信用卡於3月29日即日設定「繳款」到東亞卡,金額59850
12,恆生銀行信用卡於4月1日由54150淨現金降到5700結欠
13,4月15日,東亞銀行將手續費2850及2850及回贈一併存入東亞卡內
14,東亞卡,6000淨現金,恆生卡5700結欠。 

由於今期推廣時間太急,東亞銀行信用卡限額低的人只能玩兩轉,但如果你張東亞卡有11萬額就一次搞定。




2019年3月20日 星期三

酌量減磅新意網

近日新意網太強了,持倉市值今日一度升穿65萬,酌量減持4000股,尚有90000股可以慢慢搣。如果新意網短期內升穿7.2蚊,持股市值將再次突破65萬蚊,到時再搣走幾千股。

對上一次沽出已經係炒轉主板時候了,果陣7.09左右沽左少少。今次套現2萬幾,主要作減債及未來彈藥之用。

於20190320約十時以6.88沽出4000股。

呢幾日會出文講東亞卡冚卡,東亞近日又出優惠貼錢俾你玩卡冚卡啦,快D玩謝東亞銀行啦!


2019年3月15日 星期五

超級權重長和系下周放榜

我加加埋理就快二百萬都係長和系,名富其實「靠李啦!」。今次重點想睇長和3和電能方向。

過去一年經濟還算平穩,對長和電訊業長建公用業影響不大,咪又係D匯兌因素囉,我預期長和長建派息將繼續增長,料股息增長5%左右。之於電能呢,可能維持派息,變左隻房託。

如果呢期業績冇啥特別消息,我都要考慮幾電能減持,用來換馬或減債。


2019年3月11日 星期一

中銀信用卡月供股票

我又黎重複推薦啦,香港邊度可以買股票用信用卡仲有分賺?嘩,D股票仲免收使費,仲可以用正股價格沽出碎股?

就係中銀啦,原來我已經連續月供左5年啦,我2014年有中銀卡,期間風雨不改,期期月供。中銀信用卡係我將手上冇用的信用卡額度轉化為投資的工具,真係冇中銀冇而家o既我呀!

初初幾年谷大左個信用卡額後,2015至16年左右我中銀卡10萬大新卡10萬恆生卡10萬。

每月中銀卡供5萬,之後大新冚中銀,再之後恆生冚大新,果陣我真係借唔到咩平錢,上面呢個卡冚卡,實際年利率6至7%,都好抵架啦,對於我當時來講。

這樣冚,計好D還款日用盡D免息期,3張卡長期係負5至10萬間浮動,平均俾我套左20萬出黎買公用股,將公用股果3.5%息用黎俾利息,自己就倒貼果少少差額去等升值,基本上只要有通漲D公用股派息肯定跟升,股價都跟埋,諗黎諗去都覺得輸面太低,一直咁做落去。

D股票由中銀倉轉去恆生倉,加埋自己D儲蓄,都幾廿萬架,再玩埋抵押透支,又槓桿多20萬買公用股,又係自己倒貼果少少利息,就好像人地買樓搵租客交供款一樣。

幾年過去,資產淨值一升我就加大信用卡額,個卡額一升,可槓桿額就升,再加大個抵押透支,再買公用股,丫,D公用股又慢慢升,最後D資產淨值又升,我又去加大個信用卡額,再去谷大個槓桿,連續幾年,銀行又批我喎,咁我咪繼續去囉,信用卡額由2014年0蚊升到今日124萬8千,我真係一名冇收入證明的人,俾文件去申請我一定被定義為資料不足的「爛料」申請人

一直以來多謝哂中銀信用卡替我「將信用卡額轉化為投資」。而家我終於將無職的老媽子也申請了中銀大新恆生卡,我射部分錢去阿媽度,已經將阿媽由0蚊谷到去4萬幾蚊,阿媽目前也在卡冚卡,佢仲話買煤氣,佢話慳番D紅股手續費,而且係中銀沽煤氣可以用正股股價沽,因為係其他銀行收煤氣紅股的碎股不划算,阿媽受我影響也變得醒目,仲話D信用卡原來可以咁樣玩。




2019年3月5日 星期二

新意網會否在靜悄悄地起革命?

新意網不知不覺已經由4蚊低位升穿5蚊,昨日更觸及6蚊邊。新意網係升穿5蚊後交投活躍(比4蚊幾時比較),我都係對你好有信心架。

雖然新意網在公布業績後下跌,但又重拾升浪了。高PE股還真要心血足夠才行,還好我拉均5蚊幾平均價,不然還真難頂。

最近有消息指英國數據中心營運商Global Switch來港上市,如屬實市值吹到去900億港元。

而在較早前,新意網高價奪地,在香港數據中心地皮稀缺下再下一城,前景普遍都是偏好的,此地皮如建成將令新意網急增近一倍可供出租面積,而期間並沒有什麼新競爭者。

與此同時,新意網亦正準備為荃灣沙咀道的數據中心改建,目前該數據中心樓高不足十層,鄰近荃灣西站,真係賣俾阿媽補地價起納米樓都仲得(反正對面都係咁)。

新意網業績內亦提到正在打官司,詳情我唔貼出黎啦,內容主要係如果新意網贏左官司,就有班人冇得平租數據中心,要出黎老老實實俾市價租金去用,咁我當然你贏啦,阿門。


2019年3月4日 星期一

20190304,二月結

截至20190304,目前持股:
00001 - 長和     5000股  -$ 83.50
08008    - 新意網   94000股  -$  5.66
02318 - 中國平安   1000股  -$ 84.25
01038 - 長江基建  17500股  -$ 65.00
01928 - 金沙中國    463股  -$ 38.30(月供股票)
00006 - 電能實業  10791股  -$ 54.25(月供股票)
00003 - 中華煤氣   6449股  -$ 18.10(月供股票)
00012 - 恆基地產   1572股  -$ 44.45(月供股票)
00257    - 光大國際  13760股  -$  7.80
00371    - 北控水務  60000股  -$  4.74
01257    - 光大綠色   5000股  -$  6.16
00700    - 騰訊控股   1175股  -$336.20(扣除家人後持有)


股票總市值:$3824720
物業供滿率:34.64%(25%已付首期+75% x37/288)
減去負債後淨資產:$1220787



2019年3月1日 星期五

閃賺沽和電,多謝誠哥特別股息

業績前一日3.07買左20000股,今日用3.27沽清。原預期和電一炮過派哂,嘩,現實只派果3成幾,正常股息仲少左。

我睇你都係分幾次派哂呢筆百億現金架啦,唉,再派業績表時我再來討個紅包。

怎樣都好,兩日就搲左兩三千蚊,多謝誠哥。