20190304，二月結

截至20190304，目前持股：

00001　- 長和　　　　　５０００股  -＄　８３.５０

08008    - 新意網　　　９４０００股  -＄　　５.６６

02318　- 中國平安　　　１０００股  -＄　８４.２５

01038　- 長江基建　　１７５００股  -＄　６５.００

01928　- 金沙中國　　　　４６３股  -＄　３８.３０（月供股票）

00006　- 電能實業　　１０７９１股  -＄　５４.２５（月供股票）

00003　- 中華煤氣　　　６４４９股  -＄　１８.１０（月供股票）

00012　- 恆基地產　　　１５７２股  -＄　４４.４５（月供股票）

00257    - 光大國際　　１３７６０股  -＄　　７.８０

00371    - 北控水務　　６００００股  -＄　　４.７４

01257    - 光大綠色　　　５０００股  -＄　　６.１６

00700    - 騰訊控股　　　１１７５股  -＄３３６.２０（扣除家人後持有）

股票總市值：$3824720

物業供滿率：34.64%(25%已付首期+75% x37/288)

減去負債後淨資產：$1220787

閃賺沽和電，多謝誠哥特別股息

業績前一日3.07買左20000股，今日用3.27沽清。原預期和電一炮過派哂，嘩，現實只派果3成幾，正常股息仲少左。

我睇你都係分幾次派哂呢筆百億現金架啦，唉，再派業績表時我再來討個紅包。

怎樣都好，兩日就搲左兩三千蚊，多謝誠哥。

出清殘貨，換和電，賣產又一年唔知有冇特息呢

今日以開市價沽出閱文及上實環境等殘股，再將早前280幾蚊撈底的少少騰訊沽出，維持基本1175股。

之後用六萬幾蚊買左20000股和電香港，佢今日會公布業績，早前管理層表示會係呢份業績最後決定筆百億現金的去向，他們曾表示真的沒有合適投資就派息，玄妙到同當年電能一樣。

今日等佢業績「審判」。

2019-02-28 11:52,以新高位18.18元減持了2000股中華煤氣，15蚊買到18蚊，減一半抖抖先。

豬年冇汗錢展望，做懶豬也不做牛

支付寶，
一家四口，全部玩大新ONE卡，每月5000x4x1%，每月賺200蚊

微信支付， 一家四口，全部玩大新ONE卡，每月5000x4x1%，每月賺200蚊 

PAYME， 一家四口，全部玩大新ONE卡自己就渣打1.5%卡，每月5000x3x1%+5000x1.5%，每月賺225蚊 

八達通O易俾， 一家四口，全部玩渣打1.5%卡，每月10000x4x1.5%-25x4(轉出手續費)，每月賺500蚊 

電子支付超級冇汗錢加埋每月1125蚊，一年13500蚊。

呢D電子支付仲產生一筆介乎8至16萬的現金擺係我收銀機56日先還，但每還一筆又有新一筆由支付工具套現出黎，再利用恆生卡冚卡效果，將呢筆錢再延54日，嘩。變成我常駐16至24萬現金或以上你我戶口生息。

呢廿萬銀行的存款，當然俾我丟哂去買收息股，一年收番8000蚊，仲俾我用黎谷大資產規模搲加額，爽到彈起，自己根本一蚊都冇出過。

所以呢個豬年，呢8000蚊同13500蚊賺硬你，總共21500蚊冇汗錢。

之後今年劏自己間屋賺冇汗租金，反正我無意拉埋天窗，不如租出去了。呀，有點覺得豬年後我會變懶豬，隨便一間劏房都5500蚊，咁我就年收入66000租金，21500冇汗錢，仲未計我個股票倉的股息。

目前我的煩惱竟然係！！
PPS交繳交賬單的單日上限係十萬，天呀，神呀，鬼呀，我好多張卡都十幾萬要交，我要分兩日交，超麻煩呀！

呢D都唔係什麼神級人先做到，你地都得，你能夠負得愈多，潛力愈高，將冇用的信用卡額化為股票或其他資產生息增值，你已經贏人地幾條街。係香港，你輸個馬鼻隨時都注定呢世係只牛。

每年主動谷大一下信用卡額

有D野你唔主動做，佢真係唔會黎。

我知道有不少人都會收到銀行主動調升閣下信用卡額，但又唔係人人有，即使大家背景接近，甚至永遠A級都唔加額。

所以收唔到呢D信的人真係要主動D，否則真係蝕哂章啦，又俾人爬頭啦…基本上你只要數數自己有冇不良信用紀錄，再計一下目前欠款和總額。

我的經驗係，永遠保持「零不良信用紀錄」，即係總之記得找數啦。之後，你的信用卡年資有返幾年好D，太細可以非常容易地做數做出黎，可信性低左少少。再黎，欠款與總額比33%或以下都得啦，最好曾經有幾次打上近99%仲好。如果你總額100000，欠緊33333（曾經仲欠99999但又冇爆額喎）都仲可以申請下加額。

為左更易一擊即批，我仲會呈上資產淨值又多左的連續6個月月結單，你有薪酬證明仲好啦，不過我唔比佢都批我加額。

一年主動加一兩次額，總額破百萬不是夢（實際上仲有唔少操作令佢地覺得你真係有錢又還得起，既然你又想加我又搵唔到咩唔妥冇理由唔加額丫係咪）

能夠負得起都係實力黎，唔好用有色眼鏡睇「信用卡」，我每次見到文章話新一代年輕人欠卡數幾十萬嚴重缺乏理財觀念我都忍不住恥笑這班人。（因為佢罵埋我囉，哼）

自住樓落實分租賺冇汗錢

經過一年折騰，終於說服家人，裝修自住樓，順便整多單套房，預期裝修開支約20萬，歷時6個月。

樓係我買，錢又我俾，但最難都係點樣踢走屋企人去ABC地方暫住而已。之後真係唔知好彩定黑仔，我個單位外牆有塊石屎想跌落去，仲收到張屋宇署的鬼文件。

咁無輪如何都係要裝棚架，沙塵滾滾點都要走，即係唔順便裝修埋就笨柒啦，終於唔洗點出牙力就達成裝修方案。而分租方案啦喎，「大哥，無啦啦洗一筆裝修，錢從何來，梗係要搵辦法搲番黎先得」。就咁，分租方案都PASS埋。

裝修開支20萬
間一個獨立小套房，俾埋個廁所，水電錶連簡單裝修
之後自住個大套房
預期租金5500元起（我家離地鐵站5分鐘腳程）
預期第37個月回本有賺。

裝修金額視為投資的話，年回報率33%
期間，其他電子支付冇汗錢繼續賺

送狗迎豬，祝大家發個豬頭

嘩，好耐冇寫啦，真係唔好意思。

我過去仍一直月供煤氣，恆基和電能，目前全倉市值大約380萬，整體變動不大。早前騰訊插穿300時入左一手，昨日減持番果一手，另外亦沽清左果D上實環境呀閱文呀果D佔比小的股份，沽出所得，用黎月供股票，不過真係沒想到煤氣咁堅。

而家已經積累逾8500股煤氣，17500股長建不變，電能供很少而已但仍有10791股，新意網仍然94000股不變。我留意到新意網近日造好，我真係睇好你架。

如果我今年冇咩變動，估計收息12萬。新的一年，新的開始，祝大家步步高陞呀！

（近日又收到D借錢CALL，又手痕用月平息0.18%搲左20萬，有錢唔借？又話減息啦！真係......唔借就笨啦！）