測試此欄進行中

2018年6月4日 星期一

今個月開展新事業

  話說我一中五畢業先閒置一年才打工,大約打左就快十年工啦!初初數年都係最低工資囉,唉!第五年就獨立出黎做窗簾安裝師傅,呢行十之有九都係四五十歲,我係好少有。唔好以為「師傅」就高人工呀,我呢行每單工程計,由於唔係日日有工開,一個月咪得十幾二十單,圍起都係一萬蚊一月。

  最近呢幾年純粹只係D老師傅死的死,走的走,再加身體損耗,師傅供應每年下跌,令我工作量年年微升,在每單工程費不變下因量升而人工多左,上個月大約萬五蚊啦。

  不過D老闆們都唔肯加每單工程費,我食哂D體力活(師傅身體損耗搬唔郁果D工程),最近進入臨界點,太累人啦,唔撈啦,我驚自己比師傅更快要換關節呀!

  而家同朋友湊份各半,自立門戶,此前我已積累大筆被動收入作後盾,一年前左右亦已經衝入樓市,半腳踩入人生勝利組(其實買左樓就叫人生勝利組係幾時出現

  做到6月中就可以休息下啦,7月先開業。

  睇番我初初打工,原來都幾少人工:
2008年9月至2011年4月:每月都係6500仲要唔包食,果陣信不信由你,我2蚊買樓下麵包皮食,其實幾好味架。
2011年5月至2013年5月:改為最低工資定於時薪$28,咪又係每月6500又唔包食,呢排用步行減輕交通費。
2013年6月:獨立出來,以每單工程費計,由於工作數量不穩定,每月7500至10000蚊,好左好多。
2015年起:多左人信任我找我開工,此刻都係睇有幾多工程,每月10000至15000蚊。
2016至2017年:偶有大工程,有的話,個別月份高達五六萬,其他月份咪都係10000至15000蚊
2017年至今:工程量上升,平均萬五蚊一個月,身體損耗上升
2018年6月起:????

  打工賺有汗錢至今,出汗換取120萬左右啦,汗水真係好唔值錢呀,最近幾年光是股票收息賺價都差不多120萬,如果長和再生性D就.......哈哈!(未計其他冇汗錢)

   我一D都唔特別,賺到D錢傻傻的丟去收息,搵錢又唔係多,慳就真係好慳,初初打工為慳交通費行成粒鐘路唔坐車,順手由85KG減到60KG,當賺埋健身錢。

  如果你都係十幾二十幾歲,要去到手持百萬資產其實不難亦不易,我初初就一味慳,之後就收息收息收息,借家人錢賺息差,再之後就周圍鑽研冇汗錢,我一直當有汗錢是副業,最終係靠資產養回我。

  既然你會睇到我個BLOG,你做百萬富翁都只係時間問題而已,祝你們財運昌隆呀~


52 則留言:

  1. 繼續努力!趁後生應該出去創吓。

    回覆刪除
    回覆
    1. 我有同輩,中五繼續升學,數年前才大學畢業,讀果科香港冇人請,出黎都係萬幾蚊人工,同一時間我已經打工五六年,積累近八十萬,但係我果陣寧收息都冇買樓呀(就算係都過唔到壓測)

      刪除
  2. 成功非一朝一夕,是一點一點積聚而成!佩服你堅毅同努力,甚有共鳴!

    回覆刪除
    回覆
    1. 心態,心態決定成敗
      機會留給有準備的人

      刪除
  3. 回覆
    1. 多謝支持,
      你都成功左啦,炒左你老闆,你而家係鑽石盤黎架,小心唔好俾囡囡夾走呀^^

      刪除
  4. 多謝分享,一篇極度勵志的博文,讚!

    回覆刪除
    回覆
    1. 我好快去到你個用戶名架啦,又自由,又晉級到千萬級,我要再努力..........係舒舒服服地不知不覺地晉級到千萬級,仲有D咩冇汗錢未發現呢

      刪除
  5. 有計劃,有目標,有決心,有行動 = 成功了一大半。

    回覆刪除
    回覆
    1. 暫時有後盾頂住,即使中伏都唔會傷到根基,手上持股下年增派息機會高,每年後盾的防禦力都上升。

      刪除
  6. 回覆
    1. 謝謝支持,
      人人都做到架,不過都要放棄少少野,之後再用耐力湊夠,加油努力

      刪除
  7. 回覆
    1. 唔係高手啦,傻傻的收息,賺下息差,就是一堆小便宜
      我呢,就像每天去種果樹(打工),初初當然冇料到啦,一年後我就有365棵果樹,果樹到366日就會結果,那麼我就第366至730日都每日獲一粒果同時又去種果樹,731日就每日獲兩粒果.................一路去

      刪除
  8. 一步一步走向勝利 ,有勇氣, 有堅持!好!

    回覆刪除
    回覆
    1. 炒老闆要勇氣,仲要準備好後路
      其實員工想走,九成都係老闆引致,我地員工仲要想個好理由俾大家好落台,唉

      刪除
  9. 回覆
    1. 加油努力,
      訂下簡單目標,一步一步,除了有汗錢,再賺下D冇汗錢,又收下息,樣樣都有加速效果,如果你地月入比我更理想,可能比我更快到達呢~~

      刪除
  10. 師兄,好佩服你!祝成功!

    回覆刪除
    回覆
    1. 多謝支持,我一直認為香港係造富之地,找對方向,晉級到百萬級並不難,努力努力努力(一分血汁努力,一分冇汗錢努力,一分股票努力)

      刪除
  11. 師兄, 能走不平凡的路已經好利害, 佩服

    回覆刪除
    回覆
    1. 每個人都唔平凡的,我相信每個人都在某一領域唔平凡,也許我在賺冇汗錢方面較突出。不過我覺得活在香港已經非常幸福,隨隨便便就已經是全球最富有的10%人,我們一出世已經站在金字塔頂層儘管你仍在苦苦打工。
      今天,我出現分叉路,我選了一條少人行的路(老板的人數遠小於打工仔)

      刪除
  12. 本來是cd-rom的我, 都不能不跳出來鼓勵一下, 繼續努力!

    回覆刪除
    回覆
    1. 找到合適自己的方向,一路走下去,買了股票就關閉神經系統,一路坐貨,個個月都要正流入,唔經唔覺就會達標,是一場耐力的測驗,能撐下去,人人也可以

      刪除
  13. LOK兄只係長年累月堅持做一件簡單既嘢,時間一到,就水到渠成,變成成功人士了~~~~!!!!

    回覆刪除
    回覆
    1. 長年累月堅持咁做.....其實都幾行屍走肉
      唔打機唔拍拖唔旅行,番工等放工,放工行回家(行2小時),沖個涼就明早番工,儲夠一手的金額就買股票,咁就頭幾年

      刪除
  14. 你好 我都係九十後,共勉之

    回覆刪除
    回覆
    1. 互相加油~~
      唔拍拖會再快D達標添呀,唔小心係度鼓吹單身主義添......

      刪除
    2. 我婚都結埋了 哈哈 知唔知邊度信用卡借錢平

      刪除
    3. 呢排,東亞最正,月平息0.14%,唔洗借大額,借3萬都係0.14%,係信用卡兌現計劃。

      刪除
  15. 師兄經歷好勵志呢!加油!

    回覆刪除
    回覆
    1. 謝謝支持呀
      搵錢少過人都唔一定輸在終點架,呢個係耐力賽

      刪除
  16. 勁, 10年血汗搵120萬, 但係收息/賺價已經有120萬左右。只恨自己起步太遲。

    回覆刪除
    回覆
    1. 香港是錢搵錢的,食腦好過出汗,過去十年來,香港大部分資產價格普遍上升,汗水貶值了,
      我當初都有投資失利呀,還好選了長和系為軸心,輸極有個限度

      刪除
  17. 師兄, 指教一下, 點解每個月你既淨資產值都10幾萬咁升, 係樓既估值重估? 定係師兄既現金收入?

    回覆刪除
    回覆
    1. 我槓桿左好多,股票市值升十幾萬(現在持股市值400萬),由於借貸額不會跟隨上升,變相淨值上升,故波動甚大。

      刪除
    2. 師兄, 介意公開一下你點槓桿?

      之前見你有個人借貸, 唔計家人果筆都借幾廿萬, 買樓果陣應該做唔到MORTGAGE, 我見你又拎到 25% 首期, 4球既樓都要拎一球CASH出黎, 真心想知點變魔法。

      先行謝過。

      刪除
    3. 我仲成功搲到家人將手上股票存倉在我戶口,佢地留低兩百幾萬股票同少量現金彈藥,D股票我名下的,我又可玩孖展,變多200萬玩。
      我張銀行月結單成四五百萬,借錢都容易。
      我入市買樓時都係300萬,嘩而家樓下單位叫450萬.......

      刪除
  18. 師兄, 你的故事很勵志, 只要定下目標, 努力不懈, 終於可以達到目標。祝你黎緊開張大吉, 生意興隆!
    CL

    回覆刪除
    回覆
    1. 簡簡單單,其實唔複雜,只係賺冇汗錢需要多D手續,同埋要良好信貸記錄,其他條件都好低好簡單,咁就有每月千幾蚊冇汗錢輔助
      有汗錢就通通儲起買股,慢慢就見效果

      刪除
  19. 剛畢業果幾年窮到燶,俾朋友約出街食飯要度過先出去,偶然甚至要用信用咭透支黎支持自己/家人的生活。後來慢慢用私貸還晒信用咭債,正職人工扣完還款後有餘的就好慢好慢咁儲。

    當時的確係苦,但而家諗起都覺得窮過先會有果種體驗,令自己有種「我唔可以再窮」的決心。近年成日見到 D 位高權重,搞到公司好似無左佢會死的都可以俾再高層手起刀落即走,就覺得與其靠公司/上司,不如靠自己同錢好過...

    無啦啦變成感懷身世。其實睇到你個背景覺得好勵志,希望黎緊生意越黎越好,做熟後將盤生意變成另一個無汗錢的來源呢!

    回覆刪除
    回覆
    1. 搵唔多錢,我地要同家人傾左先,斬走「家用」支出,冇計,要家人體諒下,之後D信用卡可以玩但千萬要單單清,初初真係慢到丫......
      我都「唔可以再窮」架,慳錢太盡,而家朋友都冇幾個,佢地成日去日本玩,我唔知佢有錢定係先享受了...
      當你「唔可以再窮」,你發達有望,心態先勝一籌。

      刪除
  20. 回覆
    1. 謝謝支持呀,我都係傻傻地堅持,後期就開始多渠道賺錢

      刪除
  21. 運用槓桿而最後財務自由,讚!!!
    但小心市場波動對槓桿的風險

    回覆刪除
    回覆
    1. 謝謝提醒,我近半槓桿都係搵家人借的,基本上都找一些安心坐的股票

      刪除
  22. 你咁後生已經識諗點投資,已經好勁,祝你股仔生性,工作也更上一層樓,加油!

    回覆刪除
    回覆
    1. 諗下點樣事半功倍嘛,我自知人工唔多,但都唔一定俾人地贏,人地一開波月入多自己幾級,但如果我有其他收入就戰果難料D了

      刪除
  23. 作者已經移除這則留言。

    回覆刪除