測試此欄進行中

2018年2月20日 星期二

1,我的信用卡限額牛市一浪高一浪

  首先呢,我做散工,真係冇入息證明可言,我手上的信用卡去申請前都真係只用資產:

  第一張申請係恆生信用卡,七年前左右?我當時特意升到優越理財,果陣優越理財係五十萬起的,我申請前已維持資產淨值在五十萬以上,完全冇俾入息證明,都批左我五萬。此前,一直是恆生用戶,由0上到五十萬級。不過,當中有唔少錢都是家人ABC的,看來借外力揼大個資產淨值係有用的。

  之後,再去大新銀行,開VIP理財並再一併申請大新ONE+白金,VIP都係五十萬級冇俾入息證明,都批左兩萬。

  恆生信用卡可以玩「卡冚卡」,想賺冇汗錢的話,這是必須!!整過「卡冚卡」過程可以幫你再遲最多56天才找數:例如以下:
   
  3月1日大新信用卡負一萬,假設大新截數為每月28日
  4月26日要為大新找數
  4月25日用恆生卡交一萬俾大新,假設恆生截數為每月24日
  4月25日恆生負一萬,大新為零,恆生「卡冚卡」0%手續費
  6月22日要為恆生找數
  6月22日才由儲蓄戶嘔出一萬還恆生

3月1日簽10000,俾你拖到6月22日!
恆生信用卡截數日可以叫客服更改,改到最正果日,爽!!

  在此時,我一直利用家人中銀信用卡月供股票,每月買成兩萬蚊,之後用大新卡,付1%手續費「冚」中銀條數,再用恆生「冚」大新卡,維持近一年,期期準時找數,好像形成了高信用評分的樣子,部署下一步先。自獲得首張信用卡後,再申請多一張恆生卡,並主動要求調升大新信用卡限額,都係冇俾入息證明,果陣有客服打黎叫我補文件但我都係咁同佢講,佢覆我可能影響批核結果,不過還是順利得左喎,恆生共十二萬大新六萬。過去一年,我兩間銀行戶口的資產淨值都在五十萬以上。

  講到呢度,都仲係講緊我係2011至2013年左右的狀況


回帶相關貼文:

24 則留言:

  1. 唔好玩咁盡,小心CUT戶口,特別係大新

    回覆刪除
    回覆
    1. 實情係戶口冇cut,信用額於往後再進一步上升

      刪除
  2. 厲害 ! 我都學下野先!

    回覆刪除
    回覆
    1. 卡冚卡玩了五年左右,大新銀行有手續費賺,我又可以再遲些找數,一萬蚊數使100蚊手續費拖左一百日先找數,相當於實際年利率3.5%左右,即月平息低於0.15%左右。

      刪除
    2. 其實唔明當中賺左D咩, 好似係短期借貸咁?
      你中銀碌卡 -> 30日 -> 大新比1%手續費找左佢 -> 30日 -> 恒生卡找左佢 -> 30日咁, 碌1萬之後90日後找數?

      咁其實你係借左一次錢, 3個月後還?
      咁10000蚊, 係第30日比左1%手續費都成100蚊,
      可能差唔多係3.5~4厘啦, 但係都好貴下

      不過係有機會之下, 透支多2個月都唔錯
      搵5萬一個月就可以透支多10萬出黎洗洗

      刪除
    3. 假設在大新卡欠一萬,計盡截數日,可以56日後找數,再用恆生卡早一兩日找大新數,由於截數日特地改至最合適果日,又就正截數,又有54日左右,共110日。
      如果計埋中銀卡先欠一萬再用大新冚,中銀卡的截數日又係可以更改的,所以又可就到,又54日左右。

      中銀大新恆生,三張可獲154日左右,假設一萬,手續費大新果100蚊
      大新恆生,兩張卡,110日,手續費都係大新果100蚊

      刪除
  3. LOK LOK兄, 我最近先開始玩WECHAT PAY同ALIPAY HK. 如果你有一千萬流動資產, 你會點玩呢個遊戲? 每年現金流唔做到七厘以上, 即70萬?

    回覆刪除
    回覆
    1. 玩WECHAT-PAY、ALIPAY、PAYME、8達通,四個?
      目前上述玩五個不用任何本金,我每年賺走逾18000蚊。
      再透過果56日免找數期再用「卡冚卡」,用自己+家人共4個戶口各4個APP,
      至少有20萬現金流,一直放在銀行,零本金。就正截數日,每月都有兩星期出現30萬現金流。

      刪除
    2. 要知道玩呢個遊戲的真正現金流都真係好難計。
      由於我真係搵客服更改截數日,大部分數都就到正一正,真正現金流遠比估算高。

      刪除
    3. 呢d現金流係要還既, 你每月都有兩星期有30萬咁, 問題係你洗完都係要還返30萬, 呢d現金流條命咁短其實真係唔知有咩用, 可唔可以教下小弟可以點樣用到呢d錢

      我想像既係當普通簽卡免息透支咁, 呢一段時間例如我透支左20萬, 一個月後要還, 其實透支出黎有咩意義

      刪除
    4. 每個月都做,果d現金流就會每月持續。
      所以我玩左幾年,連續地,拖到現在都未還,使用時間遠非所想的幾十日咁短。

      刪除
  4. 我諗我都明明地, 但係最重要個點係應該一開始套現個下個做法係點,
    碌卡其實都只係消費,

    如果有方法係一開始套現1萬, 之後恆生1個月後去埋左張單, 變相呢1萬係已經永久存在

    回覆刪除
    回覆
    1. 點解我要提及中銀卡,因為中銀信用卡可以月供股票,擦卡買股票,仲有分賺,基本只選公用股,可以即買即沽最小股價波動風險,之後大新冚恆生冚,冚盡有164日先去找第一次月供股票。不過呢d已out左,我現在用支付寶微信等等作為信用卡透支工具,零風險。

      刪除
    2. 可以即買即沽?如果股票買賣多,銀行收費好貴,可能得不償失.

      刪除
    3. 中銀買入收 $50。賣出收$100。
      164天內 收息 或 賺價 都已經夠手續費了
      2號同5號 100天都已經派兩次息了

      刪除
    4. 中銀月供股票仲可以賺分,數年前月供股票冇上限,只計分都賺回八成買入手續費。
      中銀月供股票仲可以用正股價沽碎股,都只係果100賣出手續費,如堅持才能成功兄所說,基本上,半年時間俾你等,加上買公用,已經最低波動了,由於時間長,基本上我次次都能等到有賺即走。

      刪除
    5. 中銀月供股票戶口我都有,月供2-3萬已幾年,基本上人會當長倉,很少買賣,短線操作我寧願用一通,耀才等證券行‎.

      刪除
    6. 中銀月供股票真係好著數,我仍在月月供電能實業,每月賺10000分

      刪除
    7. 作者已經移除這則留言。

      刪除
    8. 而家都仲係用兩萬元,月月供電能實業,只供一只,收齊所有股息仲賺埋價。玩公用股都可以成功。
      當用盡果16X日要找數或升到好價,會減持股票,次次有賺5%以上先沽

      刪除
  5. 請指教,請問中銀碌卡 -> 30日 -> 大新比1%手續費找左佢 -> 30日 -> 恒生卡找左佢 -> 30日咁, 碌即是中銀、大新,恒生都有積分嗎?

    回覆刪除
    回覆
    1. 中銀碌卡買股果一下有積分,其餘沒有分

      刪除
  6. 過去一年,我兩間銀行戶口的資產淨值都在五十萬以上。請問恆生戶口hold住50萬股票? 大新戶口都係50萬股票?定係做其他投資?如定期?另外mpf計唔計資產?謝謝

    回覆刪除