政府派錢唔派錢

派錢，18歲以上人人受惠，唔派，留存政府，有人得米有人乞米。

派，剛成年未貢獻的一班最開心，剛來港又係未貢獻的又最開心，算死草著數計到盡的人都開心（我？）。

由於唔派的話，錢最終十之有九流向長者或草根或富裕的人，對而家剛畢業或畢業唔耐的青年無甚幫助（我呀），加埋澳門做壞榜樣。而且派和唔派，D基層和長者等等都已經係受惠的一班。財爺也許小小地意思一下，派一屆都好。

我身邊有很多同學都是低薪一族的，派一次對佢地幫助有限，好過冇囉。大學畢業的出來起薪點已不高仲要俾家人搲家用，中五出來的做藍領用汗水換金錢，搵得仲多過大學生，不過入職訓果段學徒時間得月薪幾千。也有一出來做司機跟車或sale屎，月入得果一萬，個個月得番幾千蚊剩下，拍下拖充下大頭鬼又冇左。佢地已經洗左上次果6000蚊，冇左影了，不過我例外。

因為我對長建頗有信心，又奉行單身主義（其實係，不能為子女提供較佳起跑線不如唔鬼生！既然唔打算生，拍拖做咩，做玩家浪費別人時間嗎？）又冇咩支出，我覺得果6000丟進長建，按每年增長一成，十年左右已經翻一番。我真心想政府派，我會將果6000馬上再投資唔會洗左佢，我喜歡睇住D數字上升，好好睇，睇住佢一日比一日大。