測試此欄進行中

2018年7月12日 星期四

能隨便負債百萬也是實力的表現

我相當能夠負債的人,比不能負債或難以大額負債的人更具實力。

你要破百萬,好簡單,月入一萬五,月儲一萬,一百個月就得啦,都唔使九年。

但係呢,想負一百萬喎......

壞結局,
月入一萬五,搵銀行借,月薪俾夠15倍啦,咪22萬丫,你想再多D?銀行唔批你啦,再搵財仔咪又係借多20萬丫,加埋都係四五十萬,信用評級仲花哂,你想負債破百萬就只能唔還錢之餘由得佢滾大,用法定最高年利率,大約3年你就負百萬啦,不過係之前你應該已經俾人申請破產,所以未到百萬負債級就出左局啦。

中性結局要靠外人,
月入一萬五,月儲一萬,到了第七年,有現金84萬,結婚,聯名,再買樓,仲要過到壓測,俾埋什費結婚錢,仲要九成按,買400萬樓,即係負360萬,一人一半,你終於負180萬啦,恭喜,你用7年時間達標。

中性結局不結婚靠自己仍然有排都未達標,
月入一萬五,月儲一萬,申請信用卡,首張信用卡額介乎一萬至八萬左右,信用卡額備用為主,白紙一張的信用評級要慢慢執正,用信用卡交下水電煤,準時還。

次年,現金有12萬全買公用股,申請第二張,可能有五至十萬,信用卡額備用為主。

第三年,有現金12萬再買公用股及上年公用股12萬及上年股息,又去加大信用卡額及申請信用卡,估計總信用卡額不難突破20萬。

第四年,估計已有50至60萬市值的資產,用抵押透支槓桿出30萬再射到其他銀行,申請信用卡,信用評級果度睇唔到證券抵押的。銀行只會以為你有90萬,抵押透支前的最新月結單,之後再槓桿出來的30萬開儲蓄戶口再一併申請信用卡,果一刻,神鬼都唔知你有30萬負債,順利又可提升總信用卡額,可能升到30萬左右,成功買入將錢射回,即係撒佢資。

第五年,可以接下銀行電話推銷的私貸,借15萬月平息0.2%應該冇問題啦,借款全買公用,呢一年又儲左12萬,又買公用啦,資產多左又可以申請多張信用卡,升到35萬左右冇咩問題,咁你應該手持90萬左右資產,35萬信用卡額,15萬私貸,40萬抵押透支額度。

第六年,還清私貸又儲左12萬,加埋股息,都係90至100萬資產,在一百萬的一刻去加大信用卡額再申請信用卡都SO EASY,信用卡額破40萬甚至50萬都冇問題,你信用評級咁好,又淨資產近百萬,好客呀!呢個時候,你即時玩信用卡套現又借私貸,都係負60至70萬,你的抵押透支不出現在信用評級,你都唔算負百萬,呢個結局,推演至第六年都未能夠隨隨便便負百萬,但係你的淨資產值卻已經係百萬級。

你話,負百萬仲難過搵百萬,我地要敬佩負百萬的人,我一直都認為「你欠銀行百幾萬呀」係好勁好厲害,最利害係銀行信你喎,願意批百萬俾你,呢樣野分分鐘有錢都買唔到。

所以,當你地聽見人地話有一百萬,不必葡萄,你也許可串佢,那麼你能夠負一百萬嗎?手持一百萬都唔能夠由銀行借番一百萬走,叻個屁

目前我總信用卡額已暴漲至130萬(光是恆生都38萬...),另有少量私貸,我隨時隨地可以挾帶私逃130萬走,我最喜歡用呢幾句串我D大學生同學,而我只係中五畢業,真係串到佢地反擊不能,我好希望有更多人做到。

渲洩一下情緒,皆因我身邊太多高學歷,知道我學歷後仲自以為高人一等。


回帶相關貼文:
月入一萬,十年不變,怎樣破百萬?

37 則留言:

  1. 信用額130萬真係勁,我用開2張信用卡,加埋都唔夠10萬。

    今時今日,學歷已經成為入場卷,但不是必要條件。

    回覆刪除
    回覆
    1. 初時佢地有張什麼什麼大學的信用卡,覺得好正,我就彈張優越理財信用卡俾佢睇啦,好叻咩,雖然唔係黑卡,但我覺得我最終比佢地更有機會獲得。

      而家學位泛濫,學歷都通漲

      刪除
  2. 估計已有50至60萬市值的資產,元抵押透支,槓桿出30萬再射到其他銀行,申請信用卡,信用評級果度睇唔到證券抵押的。銀行只會以為你有90萬,抵押透支前的最新月結單,之後再槓桿出來的30萬開儲蓄戶口再一併申請信用卡。
    請問申請信用卡時,是否要說明想要批較高的信用額才需要交資產證明?用30萬開儲蓄戶口,30萬放到信用卡批出即轉走?

    回覆刪除
    回覆
    1. 不用說明目的,這會增加麻煩,銀行一般都能批幾多就幾多。
      果30萬一收卡即走,目的已到馬上撒軍,呢30萬玩草木皆兵,做個樣。
      部分銀行的次一級XX理財,會要求你20萬呀10萬呀,但通常有豁免或玩出糧就可豁免,玩出糧仲簡單,自稱現金出糧,再玩恆常指示轉賬大法,每月射兩萬,轉頭提走

      刪除
  3. 天道酬勤,別為身邊的嘈音而打亂自己的節奏。

    回覆刪除
    回覆
    1. 渲洩一下如解決便秘,舒服哂
      我當然冇咩理佢地啦,不過佢地有時會展示下D年薪36萬果D卡出黎,之後我真係串下佢地,心裡還滿高興呢

      刪除
  4. 無汗錢兄你好,我最近也開始寫投資blog,多多交流。
    很認同現在學歷不是最重要

    回覆刪除
    回覆
    1. 想當初我會考都有12分,如果有父母支援補習下升到大學,不排除仲窮左。

      刪除
  5. 借私貸,信用卡套現
    之後孖展買大藍籌已經可以負債過百萬

    回覆刪除
    回覆
    1. 孖展唔寫入信貸報告,所以唔計佢,如果計佢,太容易達標

      刪除
  6. 回覆
    1. 2008至2012年,如果去左進修,就輸左5年賺有汗錢時間,價值60萬,期間你讀書仲會坐食山崩,畢業先負十幾萬,而果D中五畢業出黎就已經賺左首期買樓,假設佢成功結婚通過壓測冇問題,之後就順便坐上樓市升浪,推演5年後樓價升五成,絕殺果班大學生,讀多幾年書輸左起跑線囉。

      刪除
  7. 欣賞你! 向你學習中
    沙士期我中五畢業 、人工得五叉、呢十几年 借下借下錢、早幾年試過用citib 借 左十萬、( 果時都成 0.33 月平息、而家諗番借貴左、不過當交學費:( )、準時還款、信用額都比左十幾萬我、 兩年前冇咩資產、其實都係得強積金、儲儲下再抄抄下有廿萬老強放左係滙豐 、最後滙豐仲借左50 萬(0.15 月平息)同埋升埋張visa signaure 比我, 呢几年都有用類似你方式玩中銀月供、最近先有十萬額玩、不過就唔識用埋恒生同大新咭玩( 最近先申請緊試用你方法、剛批左大新咭六萬額)不過我就讀下讀下書讀左成十几年、呢兩年就讀多個top up degree. 因為經歷過沙士、真係冇學歷又冇經驗真係輸晒比人、我就一定冇樓主你咁靈活變通。

    回覆刪除
    回覆
    1. 加油努力,欠幾百萬為目標啦,唔好計孖展喎。
      我正努力打爆我個信用卡額,唔知可唔可以爆200萬呢,諗起都興奮。

      刪除
    2. Lok Lok 你用邊間黎做抵押投資? 完全唔未試過可否分享下心得同經驗。
      剛申請左張大新咭用tap and go loop 埋迎新:)

      刪除
    3. 如果比你負都五百萬 到時你係咪玩樓不玩股了?

      刪除
    4. 我用恆生的,息率當然冇劵商咁好,但張月結單好使好用。
      息率是P。網上自己開個抵押透支就P+1%。圍起月平都係0.25%咁上下,仲暫時唔洗還本

      刪除
    5. 玩樓風險愈來愈大啦,無意加注,既然有了自住樓暫時仍努力增加被動收入先

      刪除
    6. 同問抵押透支 利息係每月計定每日計? (半伸手黨:邊問邊上網睇緊資料中!)

      刪除
    7. 每月計,自動扣數,唔洗主動入錢
      大概1月5日負100000,2月6日就負100416.67(未計小量什費)

      刪除
    8. thanks lok sir!
      再請教抵押透支係唔係同私貸一樣跟tu分比利率客人? tu分低批既金額同機會都會細d?

      刪除
    9. Lok SIR! many thanks!!! =))))

      刪除
  8. 感謝又一編好文~
    我都係中五仔成日都自卑學歷,
    好在家人支持下(帶飯少家用)打份萬幾蚊工都儲到d錢買到d資產,
    先慢慢可以係d偽中產身上攞返少少樽鹽(佢地餐餐清)。
    而家讀完埋編,就再多個理由相信自己其實都唔差架,嘩哈哈哈~

    Leo Yuu

    回覆刪除
    回覆
    1. 通常中產就只係中產,既有美滿家庭又有豐厚資產,不少人已經失去上流動力,所以我地可預期佢地四十幾歲後果條增長曲線變得平緩。
      而D中五仔或者弱勢D的一班,若能夠突破眼前第一道困境,通常能保持果種氣勢一路上,勇於冒險,令佢地比較高機率維持增長曲線一直去,可謂先苦後甜

      刪除
  9. 師兄,我都讀書唔多,揾又搵得少過人,靠死儲爛儲的本錢,慢慢買吓資產甘。

    回覆刪除
    回覆
    1. 咁你已經不知不覺超越大部分人,恭喜你。
      有大把人月月清,去到三四十歲一個仙都冇,仲去埋怨人地或政府。

      刪除
    2. 真係! 識得唔少人都只會怨三怨四,然後繼續食好著好,邊"享受人生"咁月月清,邊麻怨冇機會。Cat已經好生性

      刪除
    3. 係呀,已經係金字塔中上層上游緊。

      刪除
  10. 不要理其他人,你既目標應該係賺千萬、億,別人有幾多信用額這些小事就不用理了。

    回覆刪除
    回覆
    1. 這些小事用來暗地歡喜的,目標不變。

      刪除
  11. 其實Lok兄都係另類博士生,博士論文係"如何攻破支付系統"!

    回覆刪除
    回覆
    1. 首先我唔係黑客呀
      我都是在條款容許下賺下D冇汗錢,大部分人視如無物,我就用到可以撐起半邊天呀!

      刪除
    2. 唉,我都好想樓主有今多信用額,
      但我仲讀緊書,同埋又冇資產證明,
      只能用每張$10000信用額玩住AAVS先

      刪除
    3. 要慢慢積累,
      「中性結局不結婚靠自己仍然有排都未達標」可供參考
      慢慢加大個額,愈大愈好玩有用。

      刪除
  12. 呢個世界實有啲狗眼看人低,以為自己果套就係真理覺得其他人不務正業的人。咪當佢地係在旁邊幫你打氣,要你向上流的階梯,無必要為此動氣o既。

    P loan 呢個我都有借,借完成舊扔去IB 買債,中間賺少少息差都好吖! 我實在唔明點解銀行肯定息3% (半年前一般都係呢個息口,近排唔知了)借五年俾你都唔借...

    回覆刪除
    回覆
    1. 有人唔借錢,有人冇錢借,唉,
      年利率5%以下我都扑倒去,買長建都抵,雖然表面實收3.5%股息自己仲要貼1.5%,都係便宜。

      刪除